नवी मुंबई। तुर्भे स्टोअर डम्पिंग ग्राउंड येथे प्रस्तावित वेस्ट-टू-एनर्जी आणि सीबीजी प्रकल्पाला स्थानिक पातळीवर पुन्हा एकदा विरोध तीव्र होताना दिसत आहे. प्रकल्पाच्या विरोधात आयोजित करण्यात आलेल्या बैठकीत शिवसेना उपजिल्हाप्रमुख सुरेश कुलकर्णी यांनी प्रशासन आणि प्रकल्प समर्थकांविरोधात आक्रमक भूमिका घेतली. स्थानिक नागरिकांच्या आरोग्याची आणि पर्यावरणाची किंमत मोजून कोणताही प्रकल्प स्वीकारला जाणार नाही, असा इशारा त्यांनी दिला.
सुरेश कुलकर्णी म्हणाले की, तुर्भे परिसर आधीच डम्पिंग ग्राउंड आणि प्रदूषणाच्या समस्यांना सामोरा जात आहे. अशा परिस्थितीत येथे वेस्ट-टू-एनर्जी प्रकल्प सुरू झाल्यास स्थानिक नागरिकांच्या आरोग्यावर गंभीर परिणाम होण्याची शक्यता आहे. काही जण या प्रकल्पाबाबत नागरिकांमध्ये गैरसमज आणि संभ्रम निर्माण करण्याचा प्रयत्न करत असल्याचा आरोपही त्यांनी केला.
“नागरिकांच्या हिताशी तडजोड करणारा कोणताही निर्णय स्वीकारला जाणार नाही. आम्हाला कितीही धमक्या दिल्या तरी आम्ही मागे हटणार नाही. गरज पडल्यास नागरिकांना सोबत घेऊन रस्त्यावर उतरून आंदोलन केले जाईल,” असा इशारा सुरेश कुलकर्णी यांनी दिला.
प्रकल्पाला विरोध केल्यामुळे आपल्याला लक्ष्य करण्याचा तसेच कथितरित्या खोट्या प्रकरणांमध्ये अडकवण्याचा प्रयत्न केला जात असल्याचा आरोपही कुलकर्णी यांनी केला. आपल्याला जीवे मारण्याच्या धमक्याही दिल्या जात असल्याचा दावा त्यांनी केला. मात्र, अशा धमक्यांना आपण घाबरणार नसून स्थानिक नागरिकांच्या हक्कांसाठी आपला संघर्ष सुरूच राहील, असे त्यांनी स्पष्ट केले.
बैठकीदरम्यान त्यांनी एमआयडीसीच्या माध्यमातून सुरू असलेल्या झोपडपट्टी पुनर्वसन प्रक्रियेचा मुद्दाही उपस्थित केला. पुनर्वसन प्रक्रियेत स्थानिक नागरिकांसमोर अनेक समस्या आणि अन्यायकारक बाबी निर्माण झाल्याचा त्यांचा दावा आहे. नागरिकांच्या एकजुटीच्या प्रयत्नांमुळे सरकारला या प्रकरणी सध्या स्थगिती द्यावी लागल्याचे त्यांनी सांगितले.
प्रस्तावित वेस्ट-टू-एनर्जी आणि सीबीजी प्रकल्पाचा परिणाम परिसरातील नागरिकांसोबतच झोपडपट्टी पुनर्वसन योजनांवरही होऊ शकतो, असा दावा सुरेश कुलकर्णी यांनी केला. गरीब आणि मध्यमवर्गीय कुटुंबांच्या हितांकडे दुर्लक्ष करून कोणताही निर्णय घेऊ नये, अशी मागणी त्यांनी केली.
या बैठकीस नगरसेविका अबोलीताई महेश कुलकर्णी, सविताताई देविदास लगाडे, सविताताई सांगले, माजी नगरसेविका संगीताताई वास्के, मुद्रिका गवळी, ज्येष्ठ समाजसेवक रामचंद्र सांगळे, देविदास लगाडे, वसंत वास्के आणि ज्येष्ठ समाजसेविका शारदाताई सुळस्कर यांच्यासह शिवसेना, युवासेना आणि महिला आघाडीचे पदाधिकारी व कार्यकर्ते उपस्थित होते.
बैठकीला तुर्भे परिसरातील मोठ्या संख्येने नागरिकांनीही उपस्थिती लावली. प्रस्तावित प्रकल्पाबाबत स्थानिक नागरिकांच्या हरकती आणि पर्यावरणीय परिणामांचा गांभीर्याने विचार करावा, अशी मागणी नागरिकांनी प्रशासनाकडे केली.तसेच, प्रशासनाने प्रकल्प जबरदस्तीने लागू करण्याचा प्रयत्न केल्यास तुर्भेतील नागरिकांच्या वतीने मोठ्या प्रमाणावर आंदोलन छेडण्यात येईल, असा इशारा देण्यात आला.दरम्यान, वेस्ट-टू-एनर्जी प्रकल्पाच्या मुद्द्यावरून तुर्भे परिसरात पुन्हा एकदा राजकीय आणि नागरिकांचा विरोध तीव्र होण्याची चिन्हे दिसून येत आहेत.
