नवी मुंबई।
पनवेल शहरात रात्रीच्या वेळी शतपावली करणाऱ्या एका कुटुंबावर अज्ञात गुंडांनी हल्ला केल्याची खळबळजनक घटना उघडकीस आली आहे. किरकोळ वादातून सुरू झालेला हा प्रकार थेट हाणामारीपर्यंत पोहोचला असून, भरवस्तीत एका महिलेचा विनयभंग करण्यात आल्याने स्थानिक नागरिकांमध्ये तीव्र संताप व्यक्त होत आहे.
मिळालेल्या माहितीनुसार, तक्रारदार आणि त्यांची पत्नी १० मे रोजी रात्री १०:३० च्या सुमारास आपल्या सोसायटीच्या परिसरात शतपावली करत होते. यावेळी एका अनोळखी इसमाने पीडित महिलेच्या दिशेने थुंकून अश्लील कृत्य केले. या प्रकाराचा जाब विचारण्यासाठी तक्रारदार गेले असता, त्या इसमाने आणि त्याच्यासोबत असलेल्या इतर ३-४ साथीदारांनी मिळून या दाम्पत्याला अर्वाच्य भाषेत शिवीगाळ करण्यास सुरुवात केली.
वाद वाढत गेल्यावर या अज्ञात इसमांनी पीडित महिलेच्या पतीवर, दिरावर आणि सासू-सासऱ्यांवर हल्ला केला. या झटापटीत एका आरोपीने पीडित महिलेला अश्लील स्पर्श करत धक्काबुक्की केली, ज्यामुळे त्यांच्या मनास लज्जा उत्पन्न झाली. धक्कादायक बाब म्हणजे, तक्रारदारांच्या सासूच्या जिभेची शस्त्रक्रिया झालेली असतानाही त्यांना जोरात धक्का देण्यात आला, ज्यामध्ये त्यांना गंभीर दुखापत झाली आहे. या संपूर्ण प्रकारामुळे परिसरात भीतीचे वातावरण पसरले आहे.
या घटनेनंतर पीडित कुटुंबाने त्वरित पनवेल शहर पोलीस ठाणे गाठून घडलेला सर्व प्रकार सांगितला. पोलिसांनी या प्रकरणी ४ अज्ञात इसमांविरुद्ध भारतीय न्याय संहिता (BNS) कलम ११५(२), ३५२ आणि ३५१(२) अन्वये अदखलपात्र गुन्ह्याची (NCR No. 1477/2026) नोंद केली आहे. सोसायटीच्या आवारातच अशा प्रकारे महिला असुरक्षित असल्याने स्थानिक रहिवाशांनी चिंता व्यक्त केली असून, पोलिसांनी या विकृत मनोवृत्तीच्या आरोपींचा तातडीने शोध घेऊन कडक कारवाई करावी, अशी मागणी केली जात आहे.
